شیو برت لال ورمن

مصنف “شیو برت لال ورمن” کے بارے میں

شناخت: روحانی شخصیت، مصنف اور رادھا سوامی مت کے مبلغشیو برت لال ورمن 1860ء میں اتر پردیش کے ضلع بھدوہی میں پیدا ہوئے۔ وہ ’’داتا دیال‘‘ اور ’’مہارشی جی‘‘ کے نام سے بھی معروف تھے۔ اپنی علمی، روحانی اور تصنیفی خدمات کے باعث انہیں رادھا سوامی تحریک کی نمایاں شخصیات میں شمار کیا جاتا ہے۔ان کی ابتدائی تعلیم گوپی گنج میں ہوئی۔ ہندی کی تعلیم لچھمن پرشاد سے، جبکہ عربی، اردو اور فارسی کی تعلیم مولانا عبد الواحد سے حاصل کی۔ بعد ازاں تحصیل چنار (ضلع مرزا پور) سے انگریزی تعلیم حاصل کی۔ کائستھ پاٹھ شالا، الہ آباد سے ایف اے کرنے کے بعد میور سینٹرل کالج، الہ آباد میں داخلہ لیا اور 1888ء میں ایم اے کی ڈگری حاصل کی۔ اپنے روحانی تبلیغی اسفار کے دوران انہیں امریکہ کی شکاگو یونیورسٹی سے ایم اے اور ایل ایل ڈی کی اسناد بھی حاصل ہوئیں۔ان کے روحانی مرشد رائے بہادر سالیگرام صاحب (حضور مہاراج) تھے، جن کے زیرِ اثر وہ رادھا سوامی روحانی تحریک سے وابستہ ہوئے۔ 1898ء میں اپنے مرشد کے وصال کے بعد 1939ء تک اس تحریک کی تبلیغ و اشاعت میں سرگرم رہے اور برصغیر سمیت دنیا کے مختلف ممالک میں اس کے پیغام کو عام کیا۔شیو برت لال نے صحافت کے میدان میں بھی نمایاں خدمات انجام دیں۔ وہ لاہور سے شائع ہونے والے اردو ہفت روزہ ’’آریہ گزٹ‘‘ کے مدیر رہے اور یکم اگست 1907ء کو ’’سادھو‘‘ کے نام سے ایک رسالہ جاری کیا، جو جلد ہی مقبول ہو گیا۔ غیر معمولی تصنیفی صلاحیتوں کے باعث انہیں بڑی شہرت حاصل ہوئی اور کہا جاتا ہے کہ انہوں نے سماجی، تاریخی، مذہبی اور روحانی موضوعات پر تقریباً تین ہزار کتابیں، رسائل اور کتابچے تحریر یا مرتب کیے۔ان کی مشہور تصانیف میں ’’لائٹ آن آنند یوگ‘‘، ’’دیال یوگ‘‘، ’’شبد یوگ‘‘، ’’رادھا سوامی یوگ‘‘، ’’رادھا سوامی مت پرکاش‘‘، ’’کبیر یوگ‘‘، ’’نانک یوگ‘‘، ’’کرم رہسیہ‘‘، ’’سہج یوگ‘‘، ’’شرن گتی یوگ‘‘ اور ’’انمول وچار‘‘ شامل ہیں۔ رادھا سوامی فلسفے اور سُرت شبد یوگ پر ان کی گراں قدر خدمات کے باعث انہیں ’’رادھا سوامی مت کا وید ویاس‘‘ بھی کہا جاتا ہے۔1911ء میں انہوں نے برما، ملایا، سنگاپور، جاوا، ہانگ کانگ، جاپان اور امریکہ کا دورہ کیا اور مختلف مقامات پر روحانی خطابات دیے۔ 1912ء میں اتر پردیش کے گوپی گنج میں اپنے آشرم کی بنیاد رکھی، جو بعد میں رادھا سوامی تحریک کا ایک اہم مرکز بن گیا۔وفات: شیو برت لال ورمن 23 فروری 1939ء کو شیو راتری کے دن وفات پا گئے۔ ان کی سمادھی گوپی گنج کے قریب رادھا سوامی دھام میں واقع ہے۔